It Nijs

Prehistoaryske bioskoop

WENEN – Us prehistoaryske foarfaars gongen al nei de bioskoop. Dat sizze Eastenrykske en Britske wittenskippers. Se hawwe ûndersyk dien nei in grut tal ôfbyldingen yn hoalen rûnom yn Europa.

“Wy hawwe tekeningen fûn dêr’t wy fan tinke dat it net samar plaatsjes binne. Wy tinke dat se diel útmeitsje fan in audiofisuele foarstelling,” seit Frederick Baker fan de universiteit fan Cambridge. “De bylden koenen noch net bewege, mar se steane efterinoar as stripferhalen. Dit wie net allinnich in skouspul foar de eagen, mar ek foar de earen, want de tekeningen wurde benammen fûn yn de wanden fan hoalen mei opfallende echo’s. De plaatsjes wienen net samar stilsteande bylden, mar se rôpen by de sjogger in ferhaal op, krekt lykas yn de bioskoop.”

De prehistoaryske bioskopen binne makke yn de perioade tusken 4000 en 1000 jier foar Kristus en geane faak oer fjochterijen, dûnsjen of jachtpartijen. Opfallend is dat der nea minsken yn deageane en dat der net folle froulju yn meispylje.

De ûndersikers wolle yn Noard-Italië, dêr’t in opfallend soad rotstekeningen foarkomme, de tekeningen ien foar ien opnimme en der in echte – bewegende – film fan meitsje.

Ek sjen:

1. Prehistoaryske planten bloeie wer MOSKOU – Planten fan tritichtûzen jier âld bloeie wer. It giet...
2. Prehistoaryske fuotprinten by Nimwegen NIMWEGEN – Yn Nimwegen binne fuotprinten út de prehistoarje fûn....
3. Protest tsjin CO2-opslach SEBALDEBUORREN – Grien Links en de lokale partij VZ2000 liede...
4. Nije bisten Australië In Australyske groep wittenskippers hat in oantal prehistoaryske diersoarten ûntdutsen,...
5. Fokseboarch online Steatsboskbehear hat in webcam delsetten by in fokseboarch. Fan kommende...