It Nijs

God bestiet net

Henk — Fri, 03 Sep 2010 08:39:33 +0000

OXFORD – De oerknal is te ferklearjen mei de wetten fan de natuerkunde. Foar it ûntstean fan it hielal is gjin eksterne “skepper” nedich. Der is gjin reden mear om it bestean fan in God oan te nimmen.

Dat skriuwe de natuerkundigen Stephen Hawking en Leonard Mlodinow yn harren boek The Grand Design, dat krekt ferskynd is. Neffens harren kin mei de swiertekrêft ferklearre wurde dat eat út neat ûntstiet. Yn earder wurk hold de wrâldferneamde Hawking der noch rekken mei dat der faaks in God nedich wie om it bestean fan it hielal te ferklearjen.

Stephen Hawking

Jongelju rêde trije libbens

Henk — Fri, 03 Sep 2010 08:24:01 +0000

BOOM – Yn Boom by Antwerpen ha trije jongelju justernacht twa bern en harren beppe út in baarnend hûs ret.

It trijespan soe om sigaretten doe’t se in bern roppen hearden. Se rûnen derhinne en murken dat der brân wie. Fluch bellen se de brânwacht. Mei help fan ien fan ‘e bern, dy’t in stoel troch it rút smiet, krongen se ta de wente yn en befrijden de twa bern – fan alve en fjirtjin jier âld – en harren beppe.

De heit fan ‘e bern wie ek yn ‘e hûs. Hy waard koart dêrnei troch de brânwacht befrijd. As iennichste is dy der min oan ta.

De brân is nei alle gedachten ûntstien troch in patatpanne dy’t te waarm wurden wie.

Jezus fan wyt nei read

Henk — Fri, 03 Sep 2010 08:00:46 +0000

GIESSENBURG – Joop van Ooijen út it Súd-Hollânske Giessenburch hat it lêzen op syn dak oanpast. Van Ooijen hie yn grute wite letters de sin “Jezus redt” op it dak fan syn boerepleats ferve. De gemeente Giessenlanden en de provinsje Súd-Hollân beskôgen dat as in oantaasting fan it lânskip. Uteinlik krige Van Ooijen de opdracht om de tekst fuort te heljen, wat er oant no ta wegere hat. Hy hat de tekst fan ‘e wike al minder opfallend makke: de letters binne no read en oranje ynstee fan wyt (sjoch de ûndersteande foto). Van Ooijen hopet dat de oerheden dat al akseptearje. Dogge dy dat net, dan moat de misjonêre kristen in twangsom fan 500 euro deis betelje.

Fryske tsjerketsjinsten 5 septimber 2010

Jan Breimer — Fri, 03 Sep 2010 06:15:10 +0000

Burdaard
PKN, Tsjerke oan ’e Ie, 09.30 u. dû. H. Post
Damwâld
Menistegem., 09.30 u. dû. Th. W. Jensma
Harich-Rûgehuzen
PKN, 09.30 u. dû. G. Hoekstra
Jutryp/De Hommerts
PKN, J. de Dopertsjerke, 09.30 u. dû. L. Westra
Ljouwert
Menistegem., 10.00 u. dû. R. Akse
Tsjalbert/De Knipe
Menistegem., 10.00 u. ds. J. Zonneveld

Bouterse wurket wer

Henk — Fri, 03 Sep 2010 06:10:29 +0000

PARAMARIBO – De Surinaamske presidint Desi Bouterse is juster wer oan it wurk gien. De eardere diktator krige koart nei syn beneaming as presidint knokkelkoarts en waard bêdridich. Hy hat him wylst wer ferhelle.

Bouterse sil hjoed de nije leden fan de steatsrie ynstallearje. Hy is fierders dwaande mei it tarieden fan steatsbesites oan Guyana en Fenesuela. Oer trije wike fljocht Bouterse nei New York ta om foar de miene gearkomste fan ‘e Feriene Naasjes te sprekken.

Wytsingeskip Thor te keap

Henk — Thu, 02 Sep 2010 22:13:46 +0000

GROU – It wytsingeskip Thor, boud út 15 miljoen iislollystokjes, is te keap. Bouwer Robert McDonald út Emmeloard hat it skip op ‘e Nederlânske hannelswebsite Marktplaats set. It skip giet nei de heechste bieder. McDonald wol de opbringst donearje oan in ynstelling dy’t him ynspant foar sike bern.

It skip Thor leit op it stuit by wettersportsintrum Aquaverium yn Grou, oan ‘e sneldyk fan it Hearrenfean nei Ljouwert. It is dêr foar elkenien te bewûnderjen. In wurdfierder fan Aquaverium jout McDonald grut gelyk: “As er it foar in moai bedrach ferkeapje kin, moat er dat fansels dwaan. De opbringst wurdt ommers goed bestege!”

Klik hjir om de advertinsje foar it skip op Marktplaats te besjen.

It wytsingeskip Thor, boud út 15 miljoen iislollystokjes. (Foto: ANP)

Opslûpen krimineeltsje deasketten

Henk — Thu, 02 Sep 2010 22:10:44 +0000

AMSTERDAM – Yn ‘e Amsterdamske binnenstêd is tongersdeitejûn in sechstjinjierrige jonge deasketten. It wie in krimineel fintsje dat al in pear kear mei de plysje te krijen hân hie. De dieder draafde fuort en is noch flechtfuottich. It hoe en het fan ‘e sjitterij is net bekend.

Omdieling yn Dongeradielen

Henk — Thu, 02 Sep 2010 19:51:30 +0000

DOKKUM – Earmelju kinne yn Dokkum tenei om in jûne byt. Yn ‘e eardere Boumanskoalle is in saneamde ‘voedselbank’ ûnderbrocht, dêr’t de alderskeamelste ruters fan freed ôf wat te iten helje kinne. Tsien húshâldingen yn ‘e Dongeradielen binne neffens de lju fan ‘e bank earmernôch dat se der teplak kinne. Gâns oaren, dy’t krekt wat minder earm wienen, hawwe har al omdôch oppenearre.

Der binne yn Nederlân mear plakken mei sa’n ‘voedselbank’. Se krije it iten fan in distribúsjekantoar yn Rotterdam.

Optocht Sint Nyk!

Meindert — Thu, 02 Sep 2010 19:26:11 +0000

Fan ‘e moarn wie it de sechstichste kear dat de Allegoaryske Optocht troch Sint Nyk ried. Hjir in foto fan de Paedwizer mei it Sineesk nijjier en de KPJ mei “de KPJ hat de toutsjes yn hannen”.

Russyske minister: mear smoke

Henk — Thu, 02 Sep 2010 19:23:03 +0000

MOSKOU – Ynwenners fan Ruslân moatte mear smoke en mear drinke. Dat sei de Russyske minister fan finânsjes Aleksej Koedrin woansdei. Mear konsumpsje liedt nammentlik ta mear belestingynkomsten foar de steat. Dy kin dêrtroch wer mear útjaan oan sosjale wissichheid. “Minsken moatte begripe dat se troch te smoken en te drinken de Russyske steat stypje,” sei Koedrin. “Wa’t in pakje sigaretten smookt, wurket mei oan it bestriden fan sosjale problemen.”

Yn Ruslân wurdt al bûtenwenstich smookt en sûpt. Sa’n 65% fan de Russyske manlju smookt en it jierlikse drankferbrûk fan de trochhinne Rus is 18 mingel. De prizen fan drank en tabak binne tige leech trochdat de steat mar in hiele lege aksyns heft. In pakje filtersigretten kostet yn Ruslân likernôch 1 euro.